Voleıbol: «Jetisý» erler komandasy sýperkýbok ıegeri atandy
ORAL. KAZINFORM – Oralda «Jaıyq arena» sport kesheninde voleıboldan erlerdiń ulttyq lıga komandalary arasynda Qazaqstan chempıonaty úshinshi úlken týrynyń oıyndary bastaldy.
Osy týr aıasynda ótken jylǵy el chempıony «Jaıyq» pen kýbok ıegeri «Jetisý» (Taldyqorǵan) komandasy sýperkýbokty sarapqa saldy.
Marat Adryshev jattyqtyratyn taldyqorǵandyqtar alǵashqy partııada 25:18 esebimen basym tústi. Ekinshi sette bastapqyda oraldyqtar (bas bapkeri Vıktor Kozık) alǵa shyqqanymen, sol qarqynyn jalǵastyra almady. Qalǵan eki set te (25:21, 25:20) «Jetisýdyń» enshisinde ketti.
Qorytyndy esep – 3:0. Osylaısha, «Jetisý» sýperkýbokty jeńip aldy.
Taldyqorǵandyqtar el chempıonatynda da 47 upaımen kósh bastap keledi. Búgin Almatynyń «Býrevestnıgin» 3:0 (29:27, 25:19, 25:17) esebimen jeńgen «Aqtóbe» 40 upaımen ekinshi orynda tur.
«Tarazdy» 3:0 (25:18, 25:17, 25:20) esebimen súrindirgen «Atyraý» 38 upaımen úzdik úshtikti túıindep tur. Oraldaǵy týr 12 aqpanda máresine jetedi.
Eske sala keteıik, budan buryn voleıboldan «Jetisý» erler komandasynyń Qazaqstan kýbogyn jeńip alǵanyn jazǵan edik.
Sondaı-aq «Turan» Ortalyq Azııa chempıondar lıgasynyń jartylaı fınalyna shyqty.
