Voleıbol: «Jetisý» erler komandasy Qazaqstan kýbogyn jeńip aldy

ASTANA. KAZINFORM – Jaqsylyq Úshkempirov atyndaǵy jekpe-jek saraıynda erler arasynda voleıboldan Qazaqstan kýbogynyń oıyndary máresine jetti.

Fınalda Marat Adryshev jattyqtyratyn «Jetisý» (Taldyqorǵan) men «Atyraý» klýby (bas bapkeri Igor Nıkolchenko) kýbokty sarapqa saldy.

Atyraýlyqtar matchty qarqyndy bastady – 25:17. Alaıda budan keıin taldyqorǵandyqtar oıyn tizginin qolyna alyp, kambek jasaı bildi – 25:18, 25:23, 25:22.

Qorytyndy esep – 3:1. Osylaısha, bıyl «Jetisý» Qazaqstan kýbogynyń ıegeri atandy.

Ótken jyly fınalda Sergeı Trıkoz jattyqtyratyn «Aqtóbe» men Oraldyń «Jaıyǵy» (bas bapkeri Vıktor Kozık) kezdesken edi. Onda aqtóbelikter kýbokty jeńip alǵan bolatyn. Bul joly qos komanda qola júldege talasty. Onda oraldyqtar 3:0 esebimen jeńiske jetip, úshinshi orynǵa ıe boldy.

Jeńimpaz-júldeger klýbtarǵa kýbok pen medal tabys etildi. Sondaı-aq jarys qorytyndysy boıynsha Borıs Kempa («Jaıyq»), Nıkıta Shvalev («Jetisý») jáne Dmıtrıı Kozlov («Atyraý») úzdik oıynshy atandy.

Eske sala keteıik, budan buryn voleıboldan Qazaqstan kýbogynyń fınalyna shyqqan komandalar belgili bolǵanyn jazǵan edik.