Voleıbol: «Jetisý» altyn úshin talasta «Berelden» aılasyn asyrdy

ASTANA. KAZINFORM — Óskemen qalasynda voleıboldan áıelderdiń ulttyq lıga komandalary arasynda Qazaqstan chempıonatynyń fınalynda «Jetisý» (Taldyqorǵan) men «Berel» alańǵa shyqty. 

Osyǵan deıin qatarynan 18 oıynda jeńiske jetken jetisýlyqtardyń favorıt sanalýy zańdy edi.

Serbııalyq maman Marko Grshıch Karına Denısova, Sılvı Ýattara, Krıstına Anıkonova, Valerııa ıAkýtına, Perızat Nurbergenova, Mádına Beket (lıbero) sııaqty tájirıbeli voleıbolshylarǵa senim artty.

Alań ıelerinen kanadalyq negizgi baılanystyrýshy Kım Robıtaıdyń aýyryp qalýyna baılanysty onyń ornyna 18 jastaǵy Balaýsa Uldybaı shyqty. Birinshi partııada ol dop bergende eki ret eıs jasap, komandasynyń 6:2 esebimen alǵa shyǵýyna múmkindik jasady. Irına Malkova, Marta Fedyk, Tatıana ıAtskıv, Tomırıs Saǵynbaeva (lıbero), Krıstına Belovalar da sátti oınaı bildi — 25:17.

Alaıda ekinshi partııada taldyqorǵandyqtar aıqyn basymdylyq tanytty — 25:12.
Úshinshi sette Rıshat Gılıazýtdınovtyń shákirtteri 10:5 esebimen alǵa shyqqanymen, sol múmkindikti paıdalana almady — 20:25. Aqyry taldyqorǵandyqtar dál sondaı eseppen matchty túıindeı bildi — 25:20.

Osylaısha, 3:1 esebimen jeńiske jetken «Jetisý» chempıondyq ataqqa jaqyndaı tústi.
Erteń qos klýb ekinshi fınaldyq kezdesýin ótkizedi.

Dúısenbi kúni sondaı-aq 7-oryn úshin básekede «Arý-Astana» almatylyq komandany 3:1 (25:23, 25:21, 23:25, 27:25) esebimen tize búktirdi.

Eske sala keteıik, budan buryn «Qýanyshtyń» qola júlde úshin ótken oıynda  «Turandy» jeńgenin jazǵan bolatynbyz.