Voleıbol: «Jaıyq» klýby «Jetisýdyń» jeńis serııasyn toqtatty
ASTANA. KAZINFORM – Kókshetaý qalasynda voleıboldan ótip jatqan erlerdiń ulttyq lıga komandalary arasynda Qazaqstan chempıonatynyń tórtinshi úlken týrynda «Jetisý» men «Jaıyq» klýby alańǵa shyqty.
Osyǵan deıin jeńis serııasyn bes matchqa jetkizgen taldyqorǵandyqtar (bas bapkeri Marat Adryshev) týrnır kestesinde 68 upaımen kósh bastap kele jatqan edi.
Al Vıktor Kozık jattyqtyratyn oraldyqtar 56 upaımen úshinshi orynda edi.
Bul joly M.Adryshev jas oıynshylarǵa senim artty.
Birinshi partııada «Jaıyq» 25:15 esebimen basym tússe, ekinshisinde «Jetisý» ese qaıyrdy – 25:19. Úshinshisinde V.Kozık shákirtteri alda boldy – 25:21. Biraq taldyqorǵandyqtar tarazy basyn qaıta teńestirdi – 25:21. Sheshýshi, besinshi sette esep 14:11 bolǵan mezette «Jaıyq» birneshe múmkindigin paıdalana almady. Degenmen matchty jeńispen túıindeı aldy – 17:15.
Osylaısha, bul oıynda «Jaıyq» 2, «Jetisý» 1 upaıǵa ıe boldy.
Búgin sondaı-aq ekinshi oryndaǵy «Aqtóbe» Almatynyń «Býrevestnık» komandasyn 3:0 (25:19, 25:22, 25:14) jeńip, upaı sanyn 64-ke jetkizdi.
Atyraýlyqtar «Tarazdan» 3:1 (25:17, 23:25, 25:14, 25:23) esebimen aılasyn asyrdy.
Eske sala keteıik, budan buryn voleıboldan kósh basyndaǵy «Jetisý» klýbynyń «Atyraýdan» basym túskenin jazǵan bolatynbyz.
