Voleıbol: «Jaıyq» klýby kósh basyndaǵy «Jetisýdy» utty

ATYRAÝ. KAZINFORM — Atyraý qalasynda voleıboldan erlerdiń ulttyq lıga komandalary arasynda ótip jatqan HHHIV Qazaqstan chempıonatynyń ekinshi týrynda Oraldyń «Jaıyǵy» men taldyqorǵandyq «Jetisý» ózara sheberlik baıqasty.

Alǵashqy oıynynda «Ushqyn-Kókshetaýǵa» jol bergen taldyqorǵandyqtar (bas bapkeri Marat Adryshev) sodan beri 11 match boıy jeńilmeı kele jatqan-dy.

Al bıyl chempıon atanǵan oraldyqtar kúzde bastalǵan jańa maýsymda qarqynyn báseńdetip, «Jetisýmen» qatar «Aqtóbe» men «Atyraýǵa» da ese jibergen bolatyn.

Bul joly birinshi partııada «Jetisý» 25:22 esebimen basymdylyq tanytty. Degenmen budan keıin Vıktor Kozıktiń shákirtteri oıyn tizginin qolyna alyp, kambek jasaı aldy – 25:23, 26:24, 25:19. Qorytyndy esep – 3:1, «Jaıyqtyń» paıdasynda.

Osylaısha, «Jetisý» klýbynyń jolyna tosqaýyl qoıǵan «Jaıyq» upaı sanyn 28-ge jetkizdi. Taldyqorǵandyqtar 33 upaımen ázirge birinshi orynda qaldy. Biraq olardy aqtóbelikter (32 upaı) ókshelep tur. 

Sergeı Trıkoz jattyqtyratyn «Aqtóbe» búgin «Ushqyn-Kókshetaýdy» tize búktirdi – 3:1 (25:21, 25:27, 25:18, 29:27).

Jeksenbi kúni qaı komandanyń kósh bastaıtyny «Aqtóbe» men «Jetisýdyń» arasyndaǵy kezdesýde sheshiledi.

Eske sala keteıik, budan buryn voleıboldan «Atyraý» klýbynyń «Jetisýdy» toqtata almaǵanyn jazǵan bolatynbyz.