Voleıbol: «Jaıyq» asa tartysty matchta «Aqtóbeni» jeńdi

ASTANA. KAZINFORM – Aqtóbe jáne Taldyqorǵan qalalarynda voleıboldan erlerdiń ulttyq lıga komandalary arasynda Qazaqstan chempıonatynyń úshinshi kishi týr oıyndary máresine jetti.

Aqtóbedegi básekeler áldeqaıda tartysty boldy. «Aqtóbe», «Jaıyq» jáne «Atyraý» bir-birine laıyqty qarsylas ekendigin kórsetti.

Vıktor Kozık jattyqtyratyn oraldyqtar «Atyraýdy» bes sette tize búktirse, atyraýlyqtar keshe «Aqtóbeni» 3:1 (25:15, 23:25, 29:31, 25:23) esebimen utyp ketti.

Búgin ortalyq match ótken jylǵy chempıon «Jaıyq» pen kúmis júldeger «Aqtóbe» (bas bapkeri Sergeı Trıkoz) arasynda boldy.

Qos komanda da tisqaqqan, tájirıbeli oıynshylarǵa senim artty. Mysaly, ýkraınalyqtar, «Aqtóbeniń» baılanystyrýshysy Roman Handrolınniń jasy 43-te bolsa, osy pozıtsııadaǵy oraldyq Volodımır Kovalchýk 41-de edi. 

Komanda kapıtany Aıbek Netalın bastaǵan «Aqtóbe» sapynda Bekarys Ǵabıtuly, reseılikter Andreı Samoılov, Kırıll Kostylenkolar shabýyl shebin nyǵaıtty.

«Jaıyqta» Oral voleıbolynyń túlekteri Vıtalıı Vorıvodın, Petr Chýrzın, Vladımır Prokofevterge Borıs Kempa, Nodırhan Qadyrhanovtar dem berdi.

Birinshi partııa 25:18 esebimen alań ıeleriniń paıdasyna aıaqtaldy. 

Ekinshi sette aqtóbelikter 13:9 esebimen alǵa ketti. Osy mezette V.Kozık V.Kovalchýktyń ornyna oraldyq jas Samǵat Salahııatovty shyǵaryp kórdi. «Jaıyq» tarazy basyn teńestirip, aqyry partııany óz esebine jazdy – 26:24.

Úshinshi partııada «Aqtóbe» taǵy da basymdylyq tanytty – 25:18.

Tórtinshisinde «Jaıyq» ese qaıyrdy – 25:21.

Sheshýshi, besinshi sette oraldyqtar 14:11 esebimen alda turǵan. Biraq A.Netalın dop qosqan sátte aqtóbelikter tarazy basyn teńestirdi. Degenmen «Jaıyq» kapıtany V.Vorıvodın dop bergende, V.Kozık shákirtteri jeńisti julyp aldy – 16:14. Qorytyndy esep – 3:2.

Taldyqorǵandaǵy kishi týrda Marat Adryshev jattyqtyratyn «Jetisý» úsh birdeı qarsylasynan basym tústi. 

Osylaısha, upaı sanyn 44-ke jetkizgen taldyqorǵandyqtar týrnır kestesinde kósh bastap keledi. «Aqtóbe» (37 upaı) ekinshi satyda. Qorjyndarynda 35 upaıdan bar «Jaıyq» pen «Atyraý» úshinshi-tórtinshi oryndardy bólisip tur.

Úshinshi úlken týr oıyndary 7-13 aqpan aralyǵynda Oral qalasynda ótedi.

Eske sala keteıik, budan buryn voleıboldan el chempıonatynda «Jaıyqtyń» atyraýlyqtardy utqanyn jazǵan edik.