Voleıbol: «Turan» qatarynan bes kezdesýin jeńispen túıindedi

PETROPAVL. KAZINFORM – Petropavl qalasynda voleıboldan áıelderdiń ulttyq lıga komandalary arasynda ótip jatqan Qazaqstan chempıonatynyń úshinshi týrynda «Turan» (Túrkistan) kezekti jeńisine qol jetkizdi.

Asqar Shalqybekovtiń shákirtteri bul joly «Almaty» komandasyn 3:0 (25:15, 25:19, 25:21) esebimen tize búktirdi.

Osylaısha, Petropavlda qatarynan bes oıynyn jeńispen aıaqtaǵan ótken jylǵy el chempıondary 40 upaımen tórtinshi orynǵa turaqtady.

Ótken jylǵy kýbok pen sýperkýbok ıeleri «Jetisý» (Taldyqorǵan) klýby 20 matchtan keıin 56 upaı jınap, týrnır kestesinde kósh bastap keledi. Marko Grshıch jattyqtyratyn taldyqorǵandyqtar búgin kósh sońyndaǵy «Ertisti» 3:0 (25:13, 25:13, 25:14) esebimen oısyrata utty.

«Qaraǵandy» aqtóbelikterdi 3:0 (25:17, 25:23, 25:19) esebimen utyp, 39 upaımen «Turandy» ókshelep tur.

Eske sala keteıik, budan buryn «Jetisý» qatarynan segiz ret jeńiske jetkenin jazǵan bolatynbyz.