Voleıbol: «Turan» ekinshi ret qatarynan jeńilip qaldy

ÓSKEMEN. KAZINFORM – Óskemen qalasynda voleıboldan áıelderdiń ulttyq lıga komandalary arasynda ótip jatqan Qazaqstan chempıonatynda el chempıony «Turan» klýby taǵy da utylyp qaldy.

Keshe tartysty oıynda «Aqtóbege» ese jibergen túrkistandyqtar (bas bapkeri Asqar Shalqybekov) búgin «Qaraǵandy» komandasymen kezdesti.

Bıyl Nurlan Sadyqov jattyqtyratyn qaraǵandylyqtar chempıonatty tym-táýir bastaǵan bolatyn.

Bul joly birinshi partııada qaraǵandylyqtar 25:21 esebimen basym tústi. Ekinshisinde dál sondaı eseppen «Turan» ese qaıyrdy. Biraq odan árige shamasy jetpedi – 20:25, 20:25. Jalpy esep – 3:1, «Qaraǵandynyń» paıdasynda.

Búgin sondaı-aq «Qýanysh» (SQO) «Arý-Astanany» 3:0 (25:17, 25:12, 26:24) tize búktirdi.

«Jetisý» (Taldyqorǵan) ulttyq lıga debıýtanty «Gratsııa KZ» komandasyn 3:0 (25:15, 25:18, 25:9 ) esebimen qapy qaldyrdy.

«Berel» (Óskemen) - «Almaty» matchyn almatylyqtar jaqsy bastaǵanymen, odan keıin alań ıeleri des bergen joq - 3:1 (24:26, 25:12, 25:12, 25:15).

Osymen birinshi týr oıyndary máresine jetti.

Týrnır kestesinde burynǵysha «Berel» men «Jetisý» 25 upaımen kósh bastap tur. «Qýanysh» (21 upaı) úzdik úshtikti túıindese, «Qaraǵandy» (18 upaı) tórtinshi orynǵa taban tiredi.

Erteń «Qýanysh» - «Gratsııa KZ», «Turan» - «Almaty», «Jetisý» - «Ertis», «Aqtóbe» - «Qaraǵandy», «Berel» - «Arý-Astana» arasynda oıyndar ótedi.

Eske sala keteıik, budan buryn voleıboldan el chempıonatynda 2 komanda kósh bastap kele jatqanyn jazǵan bolatynbyz.