Voleıbol: Tórtinshi týrdyń alǵashqy kúni favorıtter jeńiske jetti
ASTANA. KAZINFORM — Kókshetaý qalasynda voleıboldan erlerdiń ulttyq lıga komandalary arasynda Qazaqstan chempıonaty tórtinshi úlken týrynyń oıyndary bastaldy.
Alǵashqy kúni TOP-4-ke kiretin komandalardyń bári jeńiske jetti.
Aldymen «Aqtóbe» klýby «Tarazdy» 3:0 (25:21, 25:18, 30:28) esebimen tize búktirdi. Sodan keıin «Jetisý» (Taldyqorǵan) «Esilden» (SQO) aılasyn asyrdy — 3:0 (25:16, 25:17, 25:20).
«Atyraý» Almatynyń «Býrevestnıgin» 3:0 (25:21, 25:17, 25:19) esebimen utty. Sondaı-aq «Jaıyq» (Oral) alań ıeleri — «Ushqyn-Kókshetaýdy» qapy qaldyrdy — 3:0 (25:20, 25:22, 25:17).
Týrnır kestesinde taldyqorǵandyqtar 65 upaımen kósh bastasa, «Aqtóbe» (58 upaı) ekinshi orynda. Úshinshi-tórtinshi satydaǵy «Jaıyq» pen «Atyraýdyń» 53-ten upaıy bar.
Juma kúni ortalyq kezdesý «Jetisý» men «Atyraýdyń» arasynda ótpek.
Eske sala keteıik, budan buryn «Jetisý» klýbynyń chempıonat bastalǵannan beri upaıdan shashaý shyǵarmaı kele jatqanyn jazǵan bolatynbyz.
