Voleıbol: «TNK-Kazhrom» komandasy el chempıony atandy
NUR-SULTAN. QazAqparat - Erlerdiń Ulttyq lıga komandalary arasynda HHVІІ el chempıonatynyń jeńimpazy belgili boldy, dep habarlaıdy QazAqparat tilshisi.
Qazaqstan birinshiliginde úzdik shyqqan tórt komanda Tarazdaǵy «Taraz Arena» sport saraıynda júldelerdi sarapqa saldy.
Pleı-off básekesinde «Mańǵystaý» komandasyn eki márte utqan «TNK-Kazhrom» (Hromtaý) fınalǵa joldama aldy. «Atyraý» men «Esil SK» (Petropavl) komandalary arasyndaǵy birinshi match asa tartysty órbip, bes setke sozyldy. Degenmen jeńisti julyp áketken atyraýlyqtar ekinshi kezdesýinde de basym tústi.
Osylaısha altyn medal úshin hromtaýlyqtar men atyraýlyqtar synǵa tústi. 11 mamyr kúni «TNK-Kazhrom» atyraýlyqtarǵa esh múmkindik qaldyrmady - 3:0.
Búgingi matchta hromtaýlyqtar 2:0 esebimen alǵa shyqty. Sodan keıin atyraýlyqtar bir partııany alǵanymen, odan árige shamasy jetpedi. Qarsylasyn 3:1 esebimen tize búktirgen «TNK-Kazhrom» el chempıony atandy.
Ótken jyly atyraýlyqtar úzdik shyqsa, hromtaýlyqtar úshinshi orynǵa ıe bolǵan edi.
2006 jyly qurylǵannan beri alǵash ret el chempıony bolyp otyrǵan "TNK-Kazhrom" komandasyn reseılik maman Sergeı Grıbov jattyqtyrady. Komanda quramyn aıta ketsek: Roman Baınıakshın (kapıtan), Borıs Kempa, Dmıtrıı Vovnenko, Mırlan Badashev, Sergeı Okýnev, Denıs Kýcherov, Maksım Mışenko, Jaqsylyq Tileýlın, Nursultan Bımurza, Aldamjar Sıtımbetov jáne Ivan Molchanov. "Osylardyń ishinde Denıs Kýcherov ekeýmiz - Oral voleıbolynyń túlekterimiz", dedi QazAqparat tilshisine Mırlan Badashev.
Qola júlde úshin básekede keshe «Esil SK» aqtaýlyqtardy 3:1 esebimen utqan edi. Búgin «Mańǵystaý» dál sondaı eseppen ese qaıyrdy. Pleı-off básekesi eki jeńiske deıin jalǵasatyndyqtan, qola júlde máselesi erteńgi úshinshi kezdesýde sheshiledi. «Esil SK» men «Mańǵystaý» ótken jylǵy maýsymda jetinshi-segizinshi, ıaǵnı sońǵy oryndardy ıelengen edi. Bıyl olardyń júldege talasýlarynyń ózin úlken tabys dep esepteýge bolady.
