VOLEIBOL: «Taraz» tuńǵysh ret el chempıony atandy
ASTANA. QazAqparat - Pavlodar qalasynda voleıboldan erlerdiń ulttyq lıga komandalary arasynda el birinshiliginiń sońǵy, tórtinshi týrynyń oıyndary ótýde.
Qazaqstannyń voleıbol federatsııasynyń saıtynan alynǵan málimetke qaraǵanda, 21 naýryz kúni «Taraz» komandasy kósh sońynda kele jatqan Petropavldyń «Esilin» 3:0 esebimen utyp, upaı sanyn 67-ge jetkizdi.
Sóıtip belgili belarýstik maman Vıktor Beksha jattyqtyratyn tarazdyqtar qalǵan oıyndardyń nátıjesine qaramastan, aıdy aspanǵa shyǵaryp, óz tarıhynda tuńǵysh ret el chempıony atanyp otyr.
Ekinshi orynda kele jatqan pavlodarlyqtar óz alańynda aıaq astynan Oraldyń «Kondensat-Jaıyqmunaıynan» 1:3 esebimen jeńilip qaldy. Sondaı-aq qola júldeden basty úmitker «Atyraý» Óskemenniń «ShyǵysQorǵasynQurylysyna» 1:3 esebimen ese jiberse, hromtaýlyqtar ótken jylǵy el chempıony «Almaty» komandasyn 3:2 esebimen tize búktirdi.
Aıta keteıik, endi komandalardyń árqaısysy úsh oıynnan ótkizedi. Chempıonat 25 naýryz kúni márege jetip, barlyq júldegerler anyqtalady.
