Voleıbol: Petropavldaǵy týrda úsh komanda jeńilissiz keledi

PETROPAVL. KAZINFORM – Petropavl qalasynda voleıboldan áıelderdiń ulttyq lıga komandalary arasynda ótip jatqan Qazaqstan chempıonatynyń úshinshi týrynda úsh komanda jeńilissiz keledi.

Beısenbi kúni «Berel» (Óskemen) «Almatydan» 3:1 (25:11, 25:11, 23:25, 25:8) esebimen aılasyn asyrdy.

Sol sekildi «Jetisý» (Taldyqorǵan) Oraldyń «Gratsııa KZ» komandasyn ońaı jeńdi – 3:0 (25:7, 25:13, 25:10).

Alań ıeleri «Qýanysh» klýby «Arý-Astanany» qapy qaldyrdy – 3:0 (25:20, 25:15, 25:11).

Osylaısha, taldyqorǵandyqtar upaı sanyn 50-ge jetkizdi. 17 matchta qarsylastaryn utqan óskemendikterdiń enshisinde 48, «Qýanyshta» 43 upaı bar.

Juma kúni ortalyq kezdesý «Jetisý» men «Qýanyshtyń» arasynda ótedi. Sondaı-aq «Almaty» - «Aqtóbe», «Arý-Astana» - «Turan», «Ertis» - «Qaraǵandy», «Gratsııa KZ» - «Berel» ózara sheberlik baıqasady.

Eske sala keteıik, budan buryn «Turannyń» qaraǵandylyq klýbty qapy qaldyrǵanyn jazǵan bolatynbyz.