Voleıbol: «Pavlodar» klýby «Esilden» aılasyn asyrdy

TALDYQORǴAN. KAZINFORM – Taldyqorǵan qalasynda voleıboldan erlerdiń ulttyq lıga komandalary arasynda Qazaqstan chempıonatynyń úshinshi týrynda «Pavlodar» men «Esil» ózara myqtyny anyqtady.

Sergeı Grıbov jattyqtyratyn pavlodarlyqtar ótken jyly kúmis júldeger atanǵan edi.

«Pavlodar» budan buryn soltústikqazaqstandyq klýbty eki ret 3:1 esebimen tize búktirgen bolatyn. Bul joly da sol esep qaıtalandy – 3:1 (25:20, 23:25, 25:19, 25:14).

Osy oıynnan keıin pavlodarlyqtar 31 upaımen tórtinshi orynǵa kóterildi.

«Jetisý» óz alańynda kósh sońyndaǵy «Ushqyn-Kókshetaýdyń» 3:0 (25:17, 25:18, 25:16) esebimen meselin qaıyryp, 34 upaımen burynǵysha úzdik úshtikti túıindep tur.

Sársenbi, úshinshi týrdyń sońǵy kúni «Býrevestnık» - «Atyraý», «Pavlodar» - «Ushqyn-Kókshetaý», «Taraz» - «Esil», «Jetisý» - «Aqtóbe» komandalary kezdesedi. 

Kósh basynda kele jatqan Oraldyń «Jaıyǵy» úshinshi týrdy aıaqtady. Osy týrdyń qorytyndysy boıynsha batysqazaqstandyq klýbtan Borıs Kempa úzdik dep tanyldy. 

Eske sala keteıik, budan buryn Oraldyń «Jaıyǵy» 15 kezdesýden keıin jeńilis tapqanyn jazǵan bolatynbyz.