Voleıbol: Óskemenniń «Bereli» óz alańynda «Turandy» qapy qaldyrdy

ASTANA. KAZINFORM – Óskemen jáne Petropavl qalalarynda voleıboldan áıelderdiń ulttyq lıga komandalary arasynda Qazaqstan chempıonatynyń tórtinshi kishi týr oıyndary bastaldy. 

Óskemen qalasynda «A» tobynda ortalyq matchta alań ıeleri – «Berel» men Túrkistannyń «Turany» synǵa tústi.

Óskemendikter ótken jyly kúmis júldeger atansa, Asqar Shalqybekov jattyqtyratyn «Turan» óz tarıhynda alǵash ret el kýbogyn jeńip alǵan edi. Bul joly serbııalyq maman Vladımır Basovıchtiń shákirtteri alǵashqy eki partııada aıqyn basymdylyq tanytty – 25:18, 25:14. Tek sońǵy sette «Turan» 9:1 esebimen alǵa ketkenimen, óskemendikter qýyp jetip qana qoımaı, tarazy basyn ózderine aýdara bildi –25:23. Qorytyndy esep – 3:0. 

Osylaısha, upaı sanyn 49-ǵa jetkizgen «Berel» týrnır kestesinde burynǵysha úzdik úshtikti túıindep tur. Túrkistandyqtar tórtinshi satyǵa jaıǵasty. «Almaty» komandasynan 3:0 (25:23, 25:6, 25:10) esebimen aılasyn asyrǵan «Jetisý» (Taldyqorǵan) 64 upaımen kósh bastap keledi. 

Petropavlda «V» tobynda «Astanany» 3:0 esebimen tize búktirgen «Qýanysh» 57 upaımen ekinshi oryndy nyqtady. Aqtóbelikter asa tartysty oıynda 5-oryndaǵy «Qaraǵandyny» 3:2 (24:26, 25:17, 25:23, 22:25, 16:14) esebimen jeńip ketti. 

Eske sala keteıik, budan buryn «Jetisý» klýbynyń 21 kezdesý boıy jeńilmeı kele jatqanyn jazǵan bolatynbyz.