Voleıbol: Óskemenniń «Berel» komandasy «Turandy» tize búktirdi

TALDYQORǴAN. KAZINFORM – Taldyqorǵan qalasynda voleıboldan áıelderdiń ulttyq lıga komandalary arasynda Qazaqstan chempıonaty 4-týrynyń juma kúngi oıyndary aıaqtaldy.

Ortalyq kezdesý týrnır kestesinde ekinshi orynda kele jatqan Óskemenniń «Bereli» men ótken jylǵy el chempıony «Turannyń» (Túrkistan) arasynda boldy. 

Rıshat Gılıazýtdınov jattyqtyratyn óskemendikterge túrkistandyqtar birinshi partııada ǵana qarsylyq kórsete aldy – 3:0 (30:28, 25:18, 25:8).

Osylaısha, 61 upaı jınaǵan «Berel» burynǵysha 2-satyda keledi.

«Aqtóbeni» 3:0 (25:20, 25:12, 25:11) utqan «Qýanysh» (SQO) 58-upaımen úzdik úshtikte tur. 

«Arý-Astana» kósh sońyndaǵy pavlodarlyq «Ertisti» qınalmaı jeńdi – 3:0 (25:14, 25:13, 25:18).

«Jetisý» óz alańynda «Qaraǵandyny» 3:0 (25:23, 25:12, 25:16) esebimen qapy qaldyryp, 67 upaımen kóshbasshylyq tizgindi eshkimge berer emes.

Senbide komandalar demalyp, jeksenbide qaıtadan alańǵa shyǵady. Bul kúni «Arý-Astana» men «Gratsııa KZ» ózara básekege túsip, úzdik segizdikke iligý úshin talasatyn bolady. 

Eske sala keteıik, budan buryn «Jetisýdyń» qatarynan 12 matchta jeńiske qol jetkizgenin jazǵan edik.

Sondaı-aq «Gratsııa KZ» komandasy «Almatydan» aılasyn asyrdy.