Voleıbol: Óskemenniń «Altaıy» ekinshi márte qatarynan el chempıony atandy
ASTANA. QazAqparat - Voleıboldan erlerdiń ulttyq lıga komandalary arasynda el birinshiliginiń Óskemen qalasynda ótip jatqan sońǵy týrynda jergilikti «Altaı» klýby búgin qalǵan oıyndardyń nátıjesine qaramastan, ekinshi márte qatarynan el chempıony atandy, dep habarlaıdy «QazAqparat» HAA tilshisi.
«Qazsport» telearnasynan tikeleı efırde kórsetkenindeı, Igor Nıkolchenko jattyqtyratyn óskemendikter «Býrevestnık-Almaty» komandasyn 3:0 esebimen onsha qınalmaı, utty. Sóıtip 18 naýryzda márege jetetin qorytyndy týrda «Altaı» kúni buryn úzdik atansa, kúmis jáne qola júlde úshin «Pavlodar», «Atyraý» jáne «TNK «Kazhrom» (Hromtaý) komandalary talasýda.
Aıta keteıik, kezinde el chempıony, Qazaqstan kýbogynyń ıegeri, halyqaralyq týrnırlerdiń jeńimpaz-júldegeri bolǵan Oraldyń «Kondensat» klýby «Kondensat» kompanııalar toby demeýshilikten bas tartqannan keıin 2015 jyly tarap ketken bolatyn. Soǵan baılanysty «Kondensatta» ózi oınap ári ony biraz jyl jattyqtyrǵan Igor Nıkolchenko tańdaýly voleıbolshylarmen birge Óskemenniń «Altaı» komandasyna ketip, ótken jyly chempıondyq ataqqa qol jetkizgen edi. Qazirgi kezde «Altaıdyń» negizgi quramynda Oral voleıbolynyń túlekteri, kópten beri Qazaqstan namysyn qorǵap júrgen shabýylshy Vıtalıı Vorıvodın, sondaı-aq lıbero-oıynshy Mırlan Badashev alańǵa shyǵyp júr.
