Voleıbol: Óskemendik «Altaı» Qazaqstan sýperkýbogyn jeńip aldy
NUR-SULTAN. QazAqparat – Petropavl qalasynda Ulttyq lıganyń áıelder komandalary arasynda Qazaqstan chempıonatynyń 1-týry aıasynda sýperkýbok sarapqa salyndy, dep habarlaıdy QazAqparat tilshisi.
El chempıony, sondaı-aq bıylǵy kýbok ıegeri Óskemenniń «Altaıy» men Qazaqstan kýbogynyń fınalısi taldyqorǵandyq «Jetisý» alańǵa shyqty.
Serbııalyq maman Marko Grshıch jattyqtyratyn óskemendik qyzdar (komanda kapıtany Sana Anarqulova) alǵashqy partııada basymdylyq tanytty – 25:16.
Ekinshi sette Elena Pavlovanyń shákirtteri esepti teńestirdi – 25:21. Degenmen budan keıin «Altaı» qarsylastaryna des bergen joq – 25:19, 25:17. Jalpy esep – 3:1.
Osylaısha óskemendikter besinshi ret sýperkýbokty utyp aldy. Bul – olardyń bıylǵy tórtinshi júldesi. «Altaı» buǵan deıin chempıondyq pen kýbokqa qosa Azııa klýbtyq
birinshiliginde de úzdik shyqqan bolatyn.
«Altaı» jańa maýsymdy da sátti bastap, 1-týrda jeti oıynnan keıin 21 upaımen jekedara birinshi orynǵa shyqty.
Taldyqorǵandyqtar 6 kezdesýden 15 upaı jınap, ekinshi satyda qaldy.
Eske sala keteıik, budan buryn Óskemenniń «Altaıy» Qazaqstan kýbogynyń jeńimpazy atanǵanyn, voleıboldan erler arasynda sýperkýbogynyń ıegeri anyqtalǵanyn
jazǵan bolatynbyz.
