Voleıbol: Oraldyń «Jaıyǵy» birinshi týrdy 2-orynmen aıaqtady

ATYRAÝ. KAZINFORM — Atyraý qalasynda voleıboldan erlerdiń ulttyq lıga komandalary arasynda HHHІІІ Qazaqstan chempıonatynyń birinshi týrynyń oıyndary máresine jetti.

Qazaqstandyq maman Vıktor Kozık jattyqtyratyn «Jaıyq» (Oral) klýby chempıonatty sátsiz bastap, qatarynan eki ret jeńilgen edi. Sodan keıin oraldyqtar jeńis jolyna tústi.

Birinshi týrdyń sońǵy kúni «Jaıyq» 3:1 (18:25, 25:15, 25:22, 25:21) esebimen «Býrevestnık» (Almaty) komandasyn jeńdi. Osylaısha, tórt birdeı kezdesýinde qarsylastarynan basym túsken V.Kozıktiń shákirtteri 13 upaımen 2-orynǵa kóterildi. Birinshi týrdan keıin «Jetisý» (Taldyqorǵan) 15 upaımen kósh bastap tur.

«Esil» (SQO) «Ushqyn-Kókshetaý» komandasyn 3:1 (25:19, 25:15, 21:25, 25:13) esebimen jeńip, 6-orynǵa taban tiredi. 

Birinshi týrdaǵy eń sońǵy báseke «Atyraý» men «Aqtóbe» arasynda ótip, bes setke sozyldy. Munda atyraýlyqtar kambek jasap, bıylǵy sýperkýbok ıelerin 3:2 (19:25, 16:25, 25:21, 25:22, 15:12) esebimen tize búktirdi. Aqtóbelikter 11 upaımen tórtinshi satyda qaldy.

Ekinshi týr aldaǵy aıda Pavlodar qalasynda ótedi. 

Eske sala keteıik, budan buryn «Jetisý» komandasynyń «Pavlodardan» basym túskenin jazǵan bolatynbyz. Sondaı-aq voleıboldan el chempıonatynda «Jetisý» alǵash ret jeńilis tapty.