Voleıbol: «Mańǵystaý» komandasy alǵash ret el chempıonatynyń qola júldegeri atandy
NUR-SULTAN. QazAqparat - Tarazda erlerdiń Ulttyq lıga komandalary arasynda XXVII el chempıonatynyń pleı-off básekesi márege jetti, dep habarlaıdy QazAqparat tilshisi.
Qola júlde úshin «Mańǵystaý» men «Esil SK» (Petropavl) komandalary ózara kúsh synasty.
Buǵan deıin chempıonat júldegeri bolmaǵan qos klýb arasyndaǵy saıys óte tartysty ótti.
Senbi kúni alǵashqy matchta «Esil SK» komandasy 3:1 esebimen utsa, keshe mańǵystaýlyqtar dál sondaı eseppen ese qaıyrdy.
Búgin sheshýshi matchta «Mańǵystaý» komandasy qarsylasyn 3:0 esebimen tize búktirip, tuńǵysh ret qola júldeger atandy.
«Mańǵystaýdy» oraldyq maman Aleksandr Peregýda jattyqtyrady. Onyń aıtýynsha, mańǵystaýlyq komanda qurylǵanyna ekinshi jyl bolǵanyna qaramastan, Ulttyq lıgada úzdik úshtiktiń qatarynan kórinip otyr. Bul Mańǵystaý oblysynda voleıbolǵa qoldaý kórsetilip otyrǵanyn dáleldeıdi.
«Mańǵystaýdyń» quramynda Oral voleıbolynyń túlekteri, lıbero oıynshy Qaırat Baıbekov, sondaı-aq Qaırat Qalınov, Vladımır Prokofev oınaıdy.
«Esil SK» komandasynyń da tórtinshi orynǵa taban tireýi - úlken jetistik. Ásirese, komanda bapkeri ári kapıtany Sergeı Şavınskııdiń 46 jasta bolǵanyna qaramastan, áli kúnge jastarmen terezesi teń óner kórsetýi úlgi tutarlyq.
Eske sala keteıik, budan buryn «TNK-Kazhrom» komandasynyń el chempıony atanǵanyn jazǵan bolatynbyz.
Ótken jylǵy chempıon «Atyraý» kúmis júldege ıe boldy. «Atyraýdyń» da quramynda oraldyqtar Vıtalıı Vorıvodın, Anton Kýznetsov, Petr Chýrzınder bar.
Kezinde el chempıony atanǵan Oraldyń «Kondensaty» tarap ketkennen keıin batysqazaqstandyq túlekter ár jaqta oınap júr.
