Voleıbol: M.Yqsanov týrnırinde atyraýlyqtar jeńimpaz atandy
ORAL. QazAqparat - Búgin Oraldaǵy «Arman» sport kesheninde memleket jáne qoǵam qaıratkeri, Qazaqstanda basshylyq qyzmetter atqarǵan, sonyń ishinde Batys Qazaqstan oblysyn on bir jyl boıy basqarǵan Mustaqym Yqsanovty eske alýǵa arnalǵan voleıboldan ardagerler arasynda dástúrli týrnır márege jetti, dep habarlaıdy «QazAqparat» tilshisi.
Atalmysh jarysqa Batys Qazaqstan, Atyraý, Aqtóbe, Mańǵystaý oblystarynan barlyǵy on komanda qatysyp, baq synady. Toptyq básekede úzdik atanyp, jartylaı fınalǵa shyqqan atyraýlyqtar aqtóbelikterdi 2:1 esebimen tize búktirdi. Sondaı tartysty matchta hromtaýlyqtar BQO quramasyn 2:1 esebimen utyp ketti. Úshinshi oryn úshin kezdesýde aqtóbelikter batysqazaqstandyqtardy 2:0 esebimen jeńdi. Al atyraýlyqtar dál sondaı eseppen hromtaýlyqtardan basym túsip, týrnır jeńimpazy atandy.
Júldeger komandalarǵa kýbok, dıplomdar tabys etildi. Sondaı-aq oraldyq Qambar Sálimov «Úzdik baılanystyrýshy», M.Yqsanovtyń týǵan jeri Jánibek aýdanynan kelgen Telman Ǵusmanov «Týrnır aqsaqaly», aqjaıyqtyq Ádil Jolamanov «Úzdik oıynshy», hromtaýlyq Amangeldi Súıintaev «Úzdik qorǵaýshy», atyraýlyq Bolat Qabdrahıev «Úzdik shabýylshy», aqtóbelik Qambar Jaýbatyrov «Jaqsy oıyn kórsetkeni úshin», bórlilik Qabdeljamel Násipov «Jeńiske jigeri úshin» atalymdary boıynsha marapattaldy.
«Memleket jáne qoǵam qaıratkeri, 2016 jyly 90 jyldyǵy keńinen atalyp ótilgen Mustaqym Yqsanovtyń esimin máńgi este qaldyrý maqsatynda on eki jyldan beri túrli sharalar uıymdastylyp, soǵan 17 myńdaı adam qatysty. Elbasymyzdyń «Egemen Qazaqstan» gazetinde jaryq kórgen «Bolashaqqa baǵdar: rýhanı jańǵyrý» atty maqalasynda aıtylǵanyndaı, «babalardan mıras bolyp, qanymyzǵa sińgen, búginde tamyrymyzda búlkildep jatqan izgi qasıetterdi qaıta túletýimiz kerek». Osy oraıda eline jasaǵan jaqsylyǵy men eńbegi ólsheýsiz Mustaqym Yqsanovtaı biregeı tulǵalardy umytpaı, olardy keıingi urpaqqa nasıhattaı bilýge tıistimiz. Salaýatty ómir saltyn saqtap, baıytýǵa úndeıtin atalmysh týrnır de jyl saıyn, bıyl on birinshi ret uıymdastyrylyp otyr. Oǵan óńirimiz ǵana emes, kórshiles oblystardan da komandalar qatysýda. Bul da jastarǵa úlgi dep oılaımyz», dedi «QazAqparat» tilshisine M.Yqsanov atyndaǵy qoǵamdyq qordyń tóraǵasy, eńbek ardageri Asqar Ataev.
