Voleıbol: «Qýanysh» sońǵy oıynda «Jetisýdan» basym tústi
ASTANA. KAZINFORM – Petropavl qalasynda voleıboldan áıelderdiń ulttyq lıga komandalary arasynda Qazaqstan chempıonatynyń tórtinshi úlken týry máresine jetti.
Sońǵy kúni ıÝrıı Panchenko jattyqtyratyn «Qýanysh» klýby ótken jylǵy Qazaqstan chempıony, bıylǵy sýperkýbok ıegeri «Jetisýmen» (bas bapkeri – serbııalyq Marko Grshıch) alańǵa shyqty.
Birinshi partııada alań ıeleri 25:23 esebimen basymdylyq tanytty. Ekinshisinde taldyqorǵandyqtar ese qaıyrdy – 25:18. Degenmen budan keıin soltústikqazaqstandyqtar nátıjeli oınaı bildi – 25:16, 25:16. Qorytyndy esep – 3:1.
«Qýanysh» sapynda komanda kapıtany, Oral voleıbolynyń túlegi Sana Anarqulova, serbııalyq Anet Alfonso Benıtes, Janna Syroejkına, Polına Ýfımtseva sııaqty oıynshylar kózge tústi.
Tórtinshi týr qorytyndysy boıynsha «Qýanyshtan» Anet Alfonso Benıtes, «Jetisýdan» ýkraınalyq baılanystyrýshy Darıa Shargorodskaıa úzdik dep tanyldy.
Osylaısha, buǵan deıin chempıonat barysynda birde-bir ret jeńilmegen «Jetisý» sońǵy básekede ǵana súrindi. Soǵan qaramastan, taldyqorǵandyqtar 79 upaımen kósh basynda qaldy.
«Qýanysh» 72 upaımen ekinshi orynǵa turaqtady. ıÝ.Panchenkonyń shákirtteri chempıondyq ataq úshin taıtalasa alatyndyqtaryn baıqatty.
Úshinshi satydaǵy «Berel» (Óskemen) «Qaraǵandy» klýbyn tize búktirdi – 3:0 (25:12, 25:14, 25:13).
Tórtinshi orynǵa taban tiregen «Turan» (Túrkistan) «Aqtóbeden» aılasyn asyrdy – 3:0 (25:19, 25:22, 25:17).
«Almaty» komandasy «Astanany» qapy qaldyrdy – 3:1 (17:25, 25:15, 25:15, 25:21).
Endi 5-13 sáýirde Astana qalasyndaǵy «Barys arena» stadıonynda pleı-off básekeleri ótip, chempıonat júldegerleri anyqtalady.
Eske sala keteıik, budan buryn «Qýanysh» klýbynyń óz alańynda «Berelden» utylyp qalǵanyn jazǵan bolatynbyz.
Sondaı-aq «Jetisýdyń» Azııa chempıondar lıgasyndaǵy alǵashqy qarsylasy belgili boldy.
Júldeli orynnan úmitker «Qýanysh» klýby «Turannan» aılasyn asyrdy.
