Voleıbol: «Qýanysh» komandasy «Berelmen» tarazy basyn teńestirdi

ASTANA. KAZINFORM – Óskemen qalasynda voleıboldan áıelderdiń ulttyq lıga komandalary arasynda Qazaqstan chempıonatynda «Berel» men «Qýanysh» jartylaı fınalda ekinshi kezdesýin ótkizdi. 

Keshe Rıshat Gılıazýtdınov jattyqtyratyn óskemendikter soltústikqazaqstandyqtardy 3:0 esebimen jeńip, fınalǵa jaqyn turǵan edi.

Búgin alań ıeleri bilgeninen jańylǵandaı kúı keshti. Al Azamat Esimovtiń shákirtteri kerisinshe jankúıerlerine qýanysh syılady. Alǵashqy eki partııada olar aıqyn basymdylyq tanytty — 25:19, 25:17.

Úshinshi sette 8:5 esebimen «Qýanysh» alǵa shyqqanymen, «Berel» de qarap qalmady — 9:8. Esep 16:16 bolǵan mezette óskemendikterden Krıstına Belova jaraqat alyp qaldy da, onyń ornyna Kámıla Sultanbek shyqty. Osyny paıdalanǵan soltústikqazaqstandyqtar esepti 20:17-ge jetkizdi. Tatıana ıAtskıvtiń sátti oıynynyń arqasynda «Berel» tarazy basyn teńestirgenimen, odan árige shamasy jetpedi — 23:25. Qorytyndy esep 3:0-men «Qýanyshtyń» paıdasyna jazyldy.

Qos komanda 8 naýryz kúni sheshýshi, úshinshi oıyndy ótkizedi. Qaı jeńgeni fınalǵa shyǵyp, «Jetisýǵa» qarsylas atanady. 

Eske sala keteıik, budan buryn voleıboldan Qazaqstan chempıonatynda «Jetisýdyń» fınalǵa joldama alǵanyn jazǵan bolatynbyz.