Voleıbol: «Qýanysh» qola júlde úshin ótken oıynda «Turandy» jeńdi

ASTANA. KAZINFORM – Óskemen qalasynda voleıboldan áıelderdiń ulttyq lıga komandalary arasynda Qazaqstan chempıonatynyń sheshýshi oıyndary ótip jatyr.

Qola júlde úshin básekede «Qýanysh» (SQO) pen «Turan» (Túrkistan) komandalary alańǵa shyqty.

Ótken jyly Asqar Shalqybekov jattyqtyratyn túrkistandyqtar óz tarıhynda alǵash ret chempıon bolǵan edi. Sodan keıin komanda quramy biraz ózgeriske ushyrady. Al, Azamat Esimovtiń shákirtteri qola júldeni qanaǵat tutqan bolatyn.

Bul joly birinshi partııada soltústikqazaqstandyqtar sátti oınady — 25:19. Ekinshi sette tipti aıqyn basymdylyq kórsetti — 25:10. Úshinshisinde «Turan» ese qaıyrdy — 25:22. Biraq «Qýanysh» matchty jeńispen túıindeı aldy — 25:22. Qorytyndy esep — 3:1.

Erteń qos klýb ekinshi kezdesýin ótkizedi. Onda «Qýanysh» jeńiske jetse, qola júldeger atanady. «Turan» qarymta qaıtarsa, qosymşa úshinshi match oınalady.

— Biz jeńis úshin alańǵa shyqtyq. Oıymyzdan shyqpaǵan sátter de boldy. Mysaly, dop qabyldaý kezinde kemshilikterge jol berildi. Sol sekildi jóndi shabýyldaı almaǵan Janna Syroeshkınany Margarıta Belchenkomen aýystyrýǵa týra keldi. Jalpy, jeńiske jetkenimizge qýanyshtymyz, - dedi «Qýanyshtyń» bas bapkeri Azamat Esimov.

«Turan» komandasyn jattyqtyratyn Asqar Shalqybekov aýrýdan keıin Bota Ýataeva, Domınıka Strýmılonyń tolyq babynda bolmaǵandyǵyn, erteńgi oıynda shákirtteriniń bar kúsh-jigerin jumsaıtynyn jetkizdi. 

Búgin sondaı-aq 5-6 oryndar úshin matchta ulttyq lıgaǵa osy maýsymda ǵana qosylǵan «Aqtóbe» qaraǵandylyqtardy 3:2 (25:22, 9:25, 26:24, 21:25, 15:9) esebimen utyp ketti.

Eske sala keteıik, budan buryn voleıboldan Qazaqstan chempıonatynda «Bereldiń» ekinshi jyl qatarynan fınalǵa shyqqanyn jazǵan bolatynbyz.