Voleıbol: Kósh basyndaǵy «Jetisý» klýby «Atyraýdan» aılasyn asyrdy
ASTANA. KAZINFORM – Kókshetaý qalasynda voleıboldan erlerdiń ulttyq lıga komandalary arasynda Qazaqstan chempıonaty tórtinshi úlken týrynda búgin «Jetisý» men «Atyraý» alańǵa shyqty.
Marat Adryshev jattyqtyratyn taldyqorǵandyqtar týrnır kestesinde jeke-dara kósh bastap kele jatsa, atyraýlyqtar (bas bapkeri Igor Nıkolchenko) Oraldyń «Jaıyǵymen» úshinshi-tórtinshi oryndy bólisip turǵan edi.
Jankúıerler tartysty oıyn kútkenimen, «Jetisý» matchty úsh partııada bitirdi – 3:0 (25:22, 25:17, 25:21). Osylaısha, qatarynan bes básekeni jeńispen aıaqtaǵan taldyqorǵandyqtar upaı sanyn 68-ge jetkizdi.
Ótken jylǵy el chempıony «Jaıyq» klýby da kezekti úsh upaıyn aldy. Vıktor Kozıktiń shákirtteri «Tarazdy» 3:0 (29:27, 25:16, 25:23) esebimen tize búktirdi.
Oraldyqtar 56 upaımen úzdik úshtikti túıindep tur.
Eske sala keteıik, budan buryn voleıboldan tórtinshi týrdyń alǵashqy kúni favorıtter jeńiske jetkenin jazǵan bolatynbyz.
