Voleıbol: Qazaqstannyń áıelder quramasy Qytaıda ótetin II Azııa kýbogy jarysyna qatysady
ASTANA. Qyrkúıektiń 6-sy. QazAqparat /Ernur Aqanbaı/ - Qyrkúıektiń 19-y men 25-i aralyǵynda Qytaıdyń Taısang qalasynda áıelder komandalary arasynda II Azııa kýbogy úshin jarys ótedi.
Oǵan voleıboldan Qazaqstannyń áıelder quramasy da qatysady. QR Voleıbol federatsııasynyń málimetinshe, týrnırde barlyǵy 8 komanda óner kórsetetin bolady. Nellı Şerbakova jattyqtyratyn bizdiń komanda «A» tobynda Koreıa, Qytaı jáne Iran quramalarymen birge synǵa túsedi. Al, «V» tobynda Vetnam, Qytaılyq Taıpeı, Taıland jáne Japonııa quramalary ózara sheberlik baıqasady. Jarys kúntizbesine sáıkes, Qazaqstan quramasy alǵashqy oıynyn qyrkúıektiń 19-y kúni Koreıamen ótkizedi. Sodan keıin qyrkúıektiń 20-da Qytaımen jáne 21-de Iranmen oınaıdy. Jerlesterimiz sátti óner kórsetse, qyrkúıektiń 23-i kúni bolatyn shırek fınalǵa joldama alady. Al, týrnırdiń jartylaı fınaly qyrkúıektiń 24-de, aqtyq syn qyrkúıektiń 25-de ótedi.
