Voleıbol: Qazaqstannyń áıelder quramasy halyqaralyq maýsymǵa daıyndyǵyn bastady
ASTANA. Mamyrdyń 13-i. QazAqparat /Ernur Aqanbaı/ - Voleıboldan Qazaqstannyń áıelder quramasy bıylǵy halyqaralyq maýsymǵa daıyndyǵyn bastap ketti.
Qazirgi tańda bizdiń komanda Túrkııanyń Antalıa qalasynda oqý-jattyǵý jıynyn ótkizýde, dep habarlaıdy QazAqparat.
QR Voleıbol federatsııasynyń málimetinshe, Qazaqstannyń áıelder quramasy aǵymdaǵy jyly birqatar halyqaralyq jarystarǵa qatysady. Atap aıtqanda, olar shildeniń 6-sy men 11-i aralyǵynda Almatyda ótetin QR Prezıdentiniń kýbogy XVII halyqaralyq týnırine, qyrkúıektiń 19-26-sy kúnderi Qytaıdyń Taısang qalasynda ótetin Azııa kýbogy jarysyna, qazannyń 29-y men qarashanyń 14-i aralyǵynda Japonııada bolatyn Álem chempıonatyna, sondaı-aq qarashanyń 12-28-i kúnderi Qytaıdyń Gýanchjoý qalasynda ótetin XVI Azııa oıyndaryna qatysady.
Al, XVIII Qazaqstan chempıonatynyń jeńimpazy retinde «Jetisý» klýby maýsymnyń 9-18-i kúnderi Taılandta ótetin «Taıland hanshaıymynyń kýbogy» jarysyna jáne maýsymnyń 24-i men shildeniń 4-i aralyǵynda Indonezııada bolatyn klýbtyq komandalar arasyndaǵy Azııa chempıonatyna qatysatyn bolady.
