Voleıbol: Qazaqstan sýperkýboginiń ıegeri anyqtaldy
NUR-SULTAN. QazAqparat – Búgin Óskemen qalasynda voleıboldan erler komandalary arasynda sýperkýbok ıegeri anyqtaldy, dep habarlaıdy QazAqparat tilshisi.
Bas júldeni el chempıony Almatynyń «Býrevestnıgi» men Qazaqstan kýbogynyń ıegeri «Taraz» komandasy sarapqa saldy.
Tartysty ótken match barysynda belgili bapker Aleksandr Zapevalov jattyqtyratyn almatylyqtar alǵashqy eki setti óz esepterine jazdy – 25:22, 25:19.
Degenmen Borıs Grebennıkov baptaıtyn tarazdyqtar úshinshi partııada tarazy basyn ózderine aýdara bildi – 25:18.
Tórtinshi sette aldymen almatylyqtar 9:2 esebimen alǵa shyqqanymen, tarazdyqtar da qalyspady. Tarazy basyn teńestirip qana qoımaı, ózderi alǵa shyǵa bildi. Set sońyna taman «Býrevestnık» sapyndaǵy Mıhaıl Ýstınov, Sergeı Rıazanov, Nodırhan Qadyrhanov syndy voleıbolshylar sátti oınap, jeńisti julyp aldy – 25:23. Jalpy esep – 3:1.
«Býrevestnık» ótken jyly da sýperkýbok úshin oıynda «Atyraýdy» utqan bolatyn. Bıyl sol jetistigin taǵy qaıtalady.
Erteń erler komandalary arasynda Ulttyq lıganyń birinshi týr oıyndary bastalady.
Eske sala keteıik, budan buryn áıelder komandalary arasynda Óskemenniń «Altaıy» Qazaqstan kýbogynyń jeńimpazy atanǵanyn jazǵan bolatynbyz.
