Voleıbol: Qazaqstan qyzdary Olımpıadaǵa irikteý kezeńinde fınalǵa shyǵa almady
NUR-SULTAN. QazAqparat - Búgin voleıboldan Taılandtyń Nakhonratchasıma qalasynda ótip jatqan áıelder arasyndaǵy Tokıo Olımpıadasyna irikteý kezeńinde jartylaı fınalda Qazaqstan quramasy Taılandpen kezdesti, dep habarlaıdy QazAqparat tilshisi.
Búgingi kezdesýde Taıland qyzdary basymdyq tanytty. Kezdesý tartysty ótkenimen alań ıeleri alǵashqy sette 25:21 esebimen basym tústi. Odan keıin de taılandtyq voleıbolshylar qazaqstandyq quramany 25:20 esebimen jeńdi. Al úshinshi sette Qazaqstan voleıbolshylary qarsylasynan 26:24 esebimen basym tústi. Tórtinshi sette Taıland quramasy 25:21 esebimen jeńdi. Osylaısha fınalǵa Taıland quramasy joldama aldy.
Endi olar 12 qańtarda Ońtústik Koreıamen sheberlik baıqasady. Olar búgin jartylaı fınalda Taıvan quramasyn jeńdi. Al úshinshi oryn úshin Qazaqstan men Taıvan qyzdary synǵa túsedi. Fınalda jeńiske jetken qurama Tokıo Olımpıadasyna joldama alady.
Qazaqstan quramasy irikteý kezeńinde V tobynda synǵa tústi. Aldymen Iran men Indonezııadan 3:0 esebimen basym túsip, sońǵy oıynda Ońtústik Koreıadan sol eseppen jeńilip qaldy. Óz tobynda ekinshi oryn alǵan qazaqstandyqtar osylaısha jartylaı fınalǵa shyqqan bolatyn.
Qazaqstan qyzdary 2008 jyly Olımpıada oıyndaryna qatysyp, onda jalpy komandalyq esepte toǵyzynshy oryn alǵan edi.
Azııa qurlyǵynan irikteý kezeńi arqyly Olımpıadaǵa bir joldama beriledi. Dúbirli dodada barlyǵy 12 quram baq synaıdy.
