Voleıbol: Qazaqstan kýbogyn «Qýanysh» pen «Turan» komandalary sarapqa salady

ÓSKEMEN. KAZINFORM — Óskemen qalasynda voleıboldan áıelder komandalary arasynda Qazaqstan kýbogynyń fınalyna shyqqan klýbtar anyqtaldy.

Aldymen Qazaqstannyń toǵyz dúrkin chempıony, ótken jylǵy kýbok ıegeri «Jetisý» (Taldyqorǵan) men «Qýanysh» (SQO) komandalary alańǵa shyqty.

Birinshi partııada soltústikqazaqstandyqtar 20:15 esebimen alda turǵanymen, «Jetisý» qýyp jetip qana qoımaı, basymdylyq tanytty – 28:26. 

Ekinshi jáne úshinshi set 25:23 esebimen «Qýanyshtyń» paıdasyna sheshildi. Tórtinshi partııada serbııalyq maman Marko Grshıchtiń shákirtteri ese qaıyrdy – 25:16. Degenmen besinshi, sheshýshi partııada ıÝrıı Panchenko jattyqtyratyn soltústikqazaqstandyqtar jeńisti julyp aldy – 15:10. Qorytyndy esep – 3:2.

«Qýanysh» sapynda komanda kapıtany Sana Anarqulova bastaǵan qyzdar sátti óner kórsetti. Ásirese, serbııalyq Anet Alfonso Benıtes, qazaqstandyq Svetlana Nıkolaeva shabýyl shebinde nátıjeli oınady.

Ekinshi jartylaı fınalda alań ıeleri «Berel» men «Turannyń» (Túrkistan) joldary toqaılasty.

Asqar Shalqybekov jattyqtyratyn túrkistandyqtar bastapqy eki partııada basymdylyq tanytty – 25:20, 25:22. 

Budan keıin serbııalyq Vladımır Vasovıchtiń shákirtteri ese qaıtarǵandaı bolǵan – 25:18. Biraq «Turan» tórtinshi partııada matchty támamdady – 25:14. Túrkistandyqtardan komanda kapıtany, baılanystyrýshy Irına Kýznetsova, Zınat Gıesova, lıbero Sandýǵash Asanova, reseılik Elena Samoılenko, serbııalyq Anjelka Novoseldi atap ótýge bolady.

Osylaısha, «Qýanysh» pen «Turan» Qazaqstan kýbogyn sarapqa salady. Al «Jetisý» men «Berel» tek qola júlde úshin talasady. 

Eske sala keteıik, budan buryn voleıboldan «Jetisý» erler komandasynyń Qazaqstan kýbogyn jeńip alǵanyn jazǵan edik.