Voleıbol: Qazaqstan erler quramasy Bahreındegi Ulttar kýbogynan tys qaldy
ASTANA. KAZINFORM – Qazaqstan erler ulttyq quramasy Bahreınde 16 maýsymda bastalatyn AVC Ulttar lıgasy (Shaqyrý kýbogy) týrnırine qatyspaıdy.
Qazaqstan voleıbol federatsııasy málim etkenindeı, Izraıl men Iran arasyndaǵy qaqtyǵysqa baılanysty aımaqtaǵy geosaıası jaǵdaıdyń ýshyǵýynan keıin osyndaı sheshim qabyldanǵan.
– Federatsııa qysqa ýaqyt ishinde múmkin bolatyn balama baǵyttardy qarastyrdy. Alaıda olardyń eshqaısysy quramanyń Bahreınge ýaqytynda jáne sportshylardyń densaýlyǵy men qaýipsizdigine qater tóndirmeı jetýine múmkindik bermedi. Oıynshylar men bapkerlik quramnyń qaýipsizdigi – basty orynda. Sol sebepti týrnırge qatysýdan bas tartý týraly sheshim qabyldandy, - delingen resmı málimdemede.
Eske sala keteıik, budan buryn Azııa Ulttar kýbogynda Qazaqstan áıelder quramasynyń tórtinshi oryndy qanaǵat tutqanyn jazǵan bolatynbyz.