Voleıbol: Qazaqstan chempıonatynda «Jetisý» jartylaı fınalǵa joldama aldy

ASTANA. KAZINFORM – Taldyqorǵan qalasynda voleıboldan áıelderdiń ulttyq lıga komandalary arasynda Qazaqstan chempıonatynyń tórtinshi týrynda «Jetisý» merziminen buryn jartylaı fınalǵa joldama aldy. 

Serbııalyq maman Marko Grshıchtiń shákirtteri «Almatyny» 3:0 (25:21, 25:11, 25:6) esebimen oısyrata utty. Osylaısha, qatarynan 14 matchta jeńiske jetken taldyqorǵandyqtar 70 upaı jınap, jartylaı fınalǵa shyqty.

Jartylaı fınalǵa alǵashqy eki oryndy ıelengen qos komanda birden joldama alatynyn eskersek, «Jetisýdan» keıin «Bereldiń» (Óskemen) múmkindigi molyraq. Óskemendikter «Aqtóbeni» (25:19, 25:20, 25:14) esebimen tize búktirip, upaı sanyn 64-ke jetkizdi. Úshinshi satydaǵy «Qýanyshtyń» 60 upaıy bar. Aldaǵy eki oıynda «Bereldiń» joldamany ýysynan shyǵara qoıýy ekitalaı.

Úzdik segizdikke ilingen qalǵan alty komanda taǵy eki joldamany pleı-off kezeńinde sarapqa salady.

Dúısenbi kúni «Berel» - «Qaraǵandy», «Qýanysh» - «Almaty», «Ertis» - «Gratsııa KZ», «Turan» - «Aqtóbe», «Jetisý» - «Arý-Astana» klýbtary ózara kezdesedi.

Eske sala keteıik, budan buryn «Gratsııa KZ» komandasynyń «Almatydan» aılasyn asyrǵanyn jazǵan edik.

«Arý-Astana» tartysty oıynda oraldyq komandany jeńdi.