Voleıbol: Qazaqstan áıelder quramasy sońǵy oıynynda da jeńiske jetti
ASTANA. QazAqparat - Almaty qalasynda 2018 jylǵy Japonııada ótetin álem birinshiligine irikteý týrnıriniń «A» toby komandalary arasynda fınaldyq kezeńi aıaqtaldy, dep habarlaıdy «QazAqparat» tilshisi.
Qazaqstan voleıbol federatsııasynyń saıtynan alynǵan málimetke qaraǵanda, sońǵy kúni aldymen Qytaı quramasy Qytaılyq Taıpeıdi 3:0 (25:18, 25:14, 25:10) esebimen oısyrata utty. Sodan keıin Vıacheslav Shapran jattyqtyratyn qazaqstandyqtar da toptyń aýtsaıderi Fıdjı quramasyn (3:0) ońaı jeńdi. Osylaısha, qarsylastarynyń bárin utqan qytaılyqtar 12 upaımen top jeńimpazy atansa, odan úsh upaıy kem qazaqstandyqtar ekinshi orynǵa kóterildi. «A» tobynan osy qos komanda 2018 jyly Japonııada bolatyn álem chempıonatyna joldama aldy.
Taıland elinde ótken irikteý týrnırinde «B» tobynan alań ıeleri men Ońtústik Koreıa komandasy úzdik shyqty. Olar da dúnıejúzilik dodaǵa qatysady.
Aıta keteıik, qazaqstandyqtar osymen tórtinshi ret qatarynan álem chempıonatyna joldama alyp otyr. Buǵan deıin olar 2006, 2010 jáne 2014 jylǵy birinshilikte óner kórsetken edi.
