Voleıbol: «Gratsııa KZ» komandasy «Almatydan» aılasyn asyrdy

TALDYQORǴAN. KAZINFORM – Taldyqorǵan qalasynda voleıboldan áıelderdiń ulttyq lıga komandalary arasynda Qazaqstan chempıonatynyń 4-týrynda oraldyq «Gratsııa KZ» pen «Almaty» alańǵa shyqty.

Rafael Gılıazýtdınov jattyqtyratyn almatylyqtar 24 upaımen týrnır kestesinde 7-orynda tursa, kópten jeńiske jetpegen oraldyq klýb 9-satyda edi.

Osyǵan deıingi eki matchta «Almaty» basym túsken bolatyn.

Bul joly ulttyq lıgaǵa ótken jyly ǵana qosylǵan Aına Ǵubashevanyń shákirtteri alǵashqy eki partııany sátti aıaqtaı bildi – 25:21, 25:14. Úshinshi partııa almatylyqtar paıdasyna sheshildi – 25:18.

Tórtinshi sette 17:14 esebimen «Almaty» alǵa turǵan mezette oraldyqtar qýyp jetip, ózderi alǵa ketti – 22:20. Biraq sol múmkindigin paıdalana almady – 23:25.

Taı-breıkte «Gratsııa KZ» qyzdary «Almatyny» tas-talqan etti – 15:4. Ásirese, esep 6:4 bolǵannan keıin Ulmeken Ájigereeva dop bergen sátte oraldyqtar qarsylasyna esh múmkindik bergen joq. Oraldyq komanda quramynda tájirıbeli Zarına Sıtqazınova, Tatıana Demıanova, taılyq Sırıvan Dıkaev, baılanystyrýshy Mıra Ǵubashevaǵa qosa 15 jastaǵy Kúnbóbek

Saıasatova da sátti óner kórsetti. 

Osylaısha, 13 upaı jınaǵan oraldyqtar 8-oryndaǵy «Arý-Astanaǵa» (16 upaı) jaqyndaı tústi.

Úzdik segizdikke ilikken klýbtar pleı-off kezeńine joldama alady.

Eske sala keteıik, budan buryn «Jetisýdyń» qatarynan 12 matchta jeńiske qol jetkizgenin jazǵan edik.