Voleıbol: Erlerdiń ulttyq lıga komandalary arasynda el birinshiliginiń úshinshi týry márege jetti

Qazaqstan voleıbol federatsııasynyń saıtynan alynǵan málimetke qaraǵanda, bul týrda alań ıeleri barlyq oıynynda jeńiske jetip, múmkin bolǵan 12 upaıdy ıelendi. Sóıtip «Taraz» upaı sanyn 60-qa jetkizdi. Belarýs mamany Vıktor Bekshanyń shákirtterine qalǵan jeti oıynnyń ekeýinde utsa, jetip jatyr, chempıondyq ataqty ıelenedi. «Pavlodar» komandasy 42 upaımen ekinshi orynda keledi, ol - kúmis júldeden basty úmitker. Al qola júlde úshin qyzý tartys bolatyn túri bar. Buǵan ótken jylǵy el chempıony «Almaty» (33 upaı) men odan bir ǵana upaıy kem «Atyraý» komandalary talaspaq. Qalǵan oıyndaryn sátti ótkizse, 2014 jylǵy kúmis júldeger Oraldyń «Kondensat-Jaıyqmunaıy» da úshinshi orynǵa qol sozýy ábden múmkin. Olardyń enshisinde 29 upaı bar. Bul týrda Igor Nıkolchenko jattyqtyratyn batysqazaqstandyqtar «Almaty» men «Tarazdan» jeńilis taýyp, «ShyǵysQorǵasynQurylysty» 3:1, «Pavlodardy» 3:2 esebimen utty.

Kelesi tórtinshi kishi týrdyń oıyndary 3-7 naýryz aralyǵynda Oral («A» toby) men Pavlodar («B» toby) qalalarynda ótedi.

Oralda ótetin kishi týrǵa «Kondensat-Jaıyqmunaımen» birge «Atyraý», «TNK «Kazhrom» (Hromtaý), «Esil» (Petropavl) komandalary qatysyp, kúsh synasady. «Jaıyq» voleıbol klýbynyń dırektory Shoqan Keńesovtiń aıtýynsha, oıyndar «Energııa» fıtnes ortalyǵynda bolmaq. Sodan keıin 21-27 naýryzda Tarazda tórtinshi úlken týrdyń kezdesýlerimen chempıonat márege jetpek.