Voleıbol: Erler arasynda el birinshiliginiń júldegerleri belgili boldy
ASTANA. QazAqparat - Pavlodar qalasynda voleıboldan erlerdiń ulttyq lıga komandalary arasynda el birinshiliginiń sońǵy, tórtinshi týry márege jetti.
Qazaqstan voleıbol federatsııasynyń saıtynan alynǵan málimetke qaraǵanda, osy týrda 11, chempıonat qorytyndysynda barlyǵy 75 upaı jınaǵan «Taraz» komandasy jeńimpaz atansa, «Pavlodar» 55 upaımen kúmis júldege qol jetkizdi. Atyraýlyqtar bul týrdy asa sátsiz ótkizse de, 43 upaımen úshinshi orynǵa kóterildi. Ótken jylǵy el chempıony «Almaty» atyraýlyqtardan bir ǵana upaıǵa keıin qalyp, tórtinshi oryndy mise tutty. Hromtaýdyń «TNK «Kazhrom» komandasy besinshi satyǵa turaqtasa, Oraldyń «Kondensat-Jaıyqmunaıy» men Óskemenniń «ShyǵysQorǵasynQurylysy» altynshy, jetinshi oryndardy bólisti. Al Petropavldyń «Esili» kósh sońynda qaldy. Sońǵy týrda oraldyqtar pavlodarlyqtar men almatylyqtardy utqanmen, esesine «Shyǵys» pen «Tarazdan» utylyp qaldy.
