Voleıbol: el chempıonatynyń júldegerleri anyqtaldy
ASTANA. QazAqparat - Óskemen qalasynda voleıboldan erlerdiń ulttyq lıga komandalary arasynda el birinshiliginiń sońǵy týry márege jetip, júldegerler belgili boldy, dep habarlaıdy «QazAqparat» HAA tilshisi.
Qazaqstan voleıbol federatsııasynyń saıtynan alynǵan málimetke qaraǵanda, chempıonattyń sońǵy kúni «Pavlodar» jáne «TNK «Kazhrom» komandalary sáıkesinshe «Býrevestnık-Almaty» men «Esil» (Petropavl) komandalaryn 3:1 esebimen utty. Sóıtip qos komanda da 56 upaıdan jınaǵanmen, qosymsha kórsetkishter boıynsha pavlodarlyqtar kúmis júldeger atansa, hromtaýlyqtar úshinshi oryndy qanaǵat tutty.
Eske sala keteıik, Igor Nıkolchenko jattyqtyratyn Óskemenniń «Altaıy» birinshilik aıaqtalýǵa eki kún qalǵanda, el chempıony atanǵan bolatyn. Qorytyndyda 65 upaımen basqalardan qara úzip ketken óskemendikter Qazaqstan birinshiliginde qatarynan eki márte ozyq shyqty. «Atyraý» komandasy 52 upaımen tórtinshi orynǵa taban tirese, «Býrevestnık-Almaty» (42 upaı) besinshi, «Esil» (31 upaı) altynshy, «Dınamo-Taraz» (13 upaı) jetinshi oryndy ıelendi.
