Voleıbol: «Býrevestnık» tartysty matchta «Aqtóbeni» utty

TALDYQORǴAN. KAZINFORM — Taldyqorǵan qalasynda voleıboldan erlerdiń ulttyq lıga komandalary arasynda Qazaqstan chempıonaty úshinshi týrynyń básekeleri bastaldy.

Alǵashqy bolyp alańǵa «Ushqyn-Kókshetaý» men «Atyraý» komandalary shyqty.

Aleksandr Stolnıkov jattyqtyratyn kókshetaýlyqtar nebári 3 upaımen kósh sońynda kele jatsa, atyraýlyqtar (13 upaı) altynshy orynda edi.

Týr arasyndaǵy úziliste «Atyraýdyń» bas bapkeri, serbııalyq Deıan Výlıchevıch ketip, onyń ornyna Islam Jumabekov keldi.

Oıyn, jankúıerler kútkenindeı, atyraýlyqtardyń basymdylyǵymen ótti — 3:0 (25:14, 25:17, 25:20).

Oǵan qaraǵanda, «Aqtóbe» (bas bapkeri Sergeı Trıkoz) men Igor Nıkolchenko baptaıtyn «Býrevestnık» (Almaty) arasyndaǵy match áldeqaıda tartysty boldy.

Aqtóbelikter 26 upaımen ekinshi orynda tursa, almatylyqtar (22 upaı) tórtinshi satyda edi. Bul joly «Býrevestnık» 3:2 (25:21, 16:25, 17:25, 25:21, 15:11) esebimen jeńisti julyp aldy. Sóıtip 24 upaı jınap, ázirge úshinshi satyǵa kóterildi. 

Eske sala keteıik, budan buryn Taldyqorǵanda voleıboldan Qazaqstan chempıonatynyń úshinshi týry bastalatynyn jazǵan edik.