VOLEIBOL: Búgin Qazaqstannyń qos qalasynda ulttyq lıganyń erler komandalary arasynda kezekti týr oıyndary bastalady

Qazaqstan voleıbol federatsııasynyń saıtynan alynǵan málimetke qaraǵanda, Tarazda «B» tobyndaǵy komandalar, atap aıtqanda, «Taraz», «ShyǵysQorǵasynQurylys» (Óskemen), «Almaty» jáne «Pavlodar» synǵa túsedi. Al Petropavlda alań ıeleri «Esilmen» birge «Atyraý», «TNK «Kazhrom» (Hromtaý) jáne «Kondensat-Jaıyqmunaı» (Oral) klýbtary ózara kúsh synasady.

Bul kishi týr oıyndary 29 qańtar kúni márege jetedi.

Aıta keteıik, el birinshiliginde belorýssııalyq maman Vıktor Beksha jattyqtyratyn «Taraz» komandasy 39 upaımen jekedara kósh bastap keledi. Chempıondyqtan basty úmitker de bıyl tarazdyqtar bolyp otyr, óıtkeni ekinshi oryndaǵy «Pavlodar» odan baqandaı on upaıǵa artta qaldy. Ótken jylǵy el chempıony almatylyqtar men hromtaýlyqtardyń enshisinde 21 upaı bolsa, atyraýlyqtardyń bulardan bir upaıy kem. Al batysqazaqstandyqtar men óskemendikterde 18 upaıdan bar. Osy komandalardyń júldeli oryndar úshin talasýǵa áli de múmkindikteri jetedi. Eki-aq upaımen kósh sońynda qalǵan «Esil» ǵana endi eshkimmen taıtalasa almaıdy.