Voleıbol: «Berel» komandasy Qazaqstan chempıonatynyń jartylaı fınalyna shyqty

ASTANA. KAZINFORM – Taldyqorǵan qalasynda voleıboldan áıelderdiń ulttyq lıga komandalary arasynda Qazaqstan chempıonatynyń tórtinshi týrynda jartylaı fınalǵa shyqqan ekinshi komanda anyqtaldy.

Buǵan deıin týrnır kestesinde jeke-dara kósh bastap kele jatqan «Jetisý» (Taldyqorǵan) klýby merziminen buryn joldama alǵan edi.

Jartylaı fınaldyń ekinshi joldamasyna Qazaqstan ulttyq quramasynyń bas bapkeri Rıshat Gılıazýtdınov jattyqtyratyn «Berel» (Óskemen) komandasy qol jetkizdi.

Óskemendikter sońǵy oıynynda «Almatyny» 3:0 (25:13, 25:17, 25:13) esebimen ońaı jeńip, 67 upaı jınap, týrnır kestesinde ekinshi orynǵa turaqtady. Úshinshi satydaǵy 63 upaıy bar «Qýanysh» búgingi oıynynda «Arý-Astanany» utsa da, «Berelge» jete almaıdy.

Ótken jylǵy el chempıony «Turan» keshe aqtóbelikterden jeńilip qalǵandyqtan, besinshi orynda qaldy. Túrkistandyqtar búgin «Qaraǵandyny» 3:1 (25:20, 25:23, 18:25, 25:21) esebimen utqanymen, qaraǵandylyqtar 50 upaımen tórtinshi satyǵa taban tiredi. «Turan» olardan bir upaıǵa qalys qaldy.

Eske sala keteıik, budan buryn «Aqtóbeniń» túrkistandyq «Turandy» utqanyn jazǵan edik.