Voleıbol: áıelder arasynda el chempıonatynyń jeńimpaz-júldegerleri belgili boldy
ASTANA. QazAqparat - Búgin Óskemen qalasynda áıelderdiń ulttyq lıga komandalary arasynda el birinshiliginiń qorytyndy týry aıaqtalyp, jeńimpaz-júldegerler belgili boldy, dep habarlaıdy «QazAqparat» HAA tilshisi.
Qazaqstan voleıbol federatsııasynyń saıtynan alynǵan málimetke qaraǵanda, sońǵy oıynda túrkııalyq maman Býrhan Janbolat jattyqtyratyn Óskemenniń «Altaıy» «Astana» komandasyn 3:0 esebimen tize búktirip, 78 upaımen ekinshi jyl qatarynan el chempıony atandy. Pavlodardyń «Irtysh-Kazhrom» komandasy «Almatyny» 3:0 esebimen utyp, 75 upaımen kúmis júldege qol jetkizdi. Al qola medal birinshilik qorytyndysynda 61 upaı jınaǵan Taldyqorǵannyń «Jetisý» komandasyna buıyrdy.
Óskemende ótken sońǵy týrda alań ıeleri barlyq bes kezdesýinde de jeńiske jetip, 15 upaıdy ıelendi. Olar bul týrda ózderiniń altyn júlde úshin negizgi qarsylasy - pavlodarlyqtardy da utty.
Chempıonattyń úzdik oıynshylary da anyqtaldy. Atap aıtqanda, Korınna Ishımtseva («Jetisý») úzdik pas berýshi, Radmıla Beresneva («Irtysh-Kazhrom») men ıÝnıeska Robles Batısta («Altaı») úzdik shabýylshy, Krıstına Anıkonova («Altaı») men Alla Bogdashkına («Irtysh-Kazhrom») úzdik tosqaýyl qoıýshy, Álııa Sadyqova («Altaı») úzdik lıbero, Krıstına Karapetıan («Irtysh-Kazhrom») úzdik dıagonal oıynshy atandy. Al Oral voleıbolynyń túlegi, «Altaı» klýby men Qazaqstan ulttyq quramasynyń múshesi Sana Anarqulova eń baǵaly oıynshy ataǵyna qol jetkizdi.
