Voleıbol: Atyraýlyqtar «Jetisý» klýbyn toqtata almady
ORAL. KAZINFORM — Oral qalasyndaǵy «Jaıyq arena» sport kesheninde voleıboldan erlerdiń ulttyq lıga komandalary arasynda úshinshi úlken týr oıyndary jalǵasyn tapty.
Bul joly ortalyq kezdesý «Jetisý» (Taldyqorǵan) men «Atyraý» komandalary arasynda boldy.
Marat Adryshev baptaıtyn taldyqorǵandyqtar týrnır kestesinde jeke-dara kósh bastaýmen qatar jýyrda sýperkýbokty utyp alǵan edi. Al Igor Nıkolchenkonyń shákirtteri úzdik úshtikti túıindep turǵan.
Barynsha tartysty órbigen oıynda «Jetisý» 3:1 (25:19, 17:25, 25:23, 25:20) esebimen utty.
Osylaısha, taldyqorǵandyqtar jeńis serııasyn 7 matchqa jetkizip, 53 upaımen qara úzip ketti.
Ekinshi oryndaǵy «Aqtóbe» klýby (46 upaı) «Ushqyn-Kókshetaýdy» 3:0 (25:23, 25:12, 26:24) esebimen tize búktirdi.
Ótken jylǵy el chempıony «Jaıyq» komandasy óz alańynda «Tarazdan» aılasyn asyrdy — 3:0 (25:13, 25:14, 25:15). Sóıtip «Atyraýdy» qýyp jetip, 41 upaımen úshinshi orynǵa shyqty.
Almatynyń «Býrevestnıgi» SQO-nyń «Esilin» 3:1 (28:26, 22:25, 25:19, 26:24) esebimen jeńdi.
Eske sala keteıik, budan buryn voleıboldan «Jetisýdyń» qatarynan 6 oıynda jeńiske jetkenin jazǵan edik.
Sondaı-aq «Turan» Ortalyq Azııa chempıondar lıgasynda kúmis júldeger atandy.
