Voleıbol: «Atyraýdy» jeńgen «Jaıyq» upaı sanyn 40-qa jetkizdi

TALDYQORǴAN. KAZINFORM — Taldyqorǵan qalasynda voleıboldan erlerdiń ulttyq lıga komandalary arasynda ótip jatqan Qazaqstan chempıonatynyń úshinshi týrynda «Jaıyq» pen «Atyraý» klýbtary kezdesti.

Osyǵan deıin qatarynan 12 matchty jeńispen túıindegen oraldyqtar sol qarqynynan bul joly da jańylǵan joq.

Ótken maýsymda shırek fınalda «Jaıyq» atyraýlyqtarǵa jol berip, júldeli oryndarǵa talasýdan tys qalǵan edi. 

Oraldyqtardyń bapkeri Vıktor Kozık tájirıbeli oıynshylarǵa senim artyp, arasynda aýystyryp ta otyrdy. Báseke barysynda Islam Jumabekov jattyqtyratyn atyraýlyqtar alǵa shyqqanymen, «Jaıyq» uzatpaı, tarazy basyn ózderine aýdara bildi — 3:0 (25:22, 25:20, 25:17).

Sóıtip, upaı sanyn 40-qa jetkizgen «Jaıyq» komandasy bıyl chempıondyqtan úmitker ekendigin tanytyp keledi.

Búgin sondaı-aq «Aqtóbe» klýby SQO-nyń «Esilin» 3:1 (25:16, 25:22, 24:26, 25:19) esebimen jeńip, 32 upaımen ekinshi orynǵa ornyqty. 

Eske sala keteıik, budan buryn «Aqtóbeniń» tartysty matchta «Atyraýdy» utqanyn jazǵan bolatynbyz.