Voleıbol: «Atyraý» tartysty matchta «Pavlodardan» aılasyn asyrdy

ASTANA. KAZINFORM — Taldyqorǵanda voleıboldan erlerdiń ulttyq lıga komandalary arasynda Qazaqstan chempıonatynyń III týrynda «Pavlodar» men «Atyraý» ózara myqtyny anyqtady.

Pavlodarlyqtar ótken jyly kúmis júldeger atansa, atyraýlyqtar tórtinshi orynǵa taban tiregen edi.

Bıyl qos komanda da ala-qula oıyn órnegin kórsetýde. Bul joly Islam Jumabekov baptaıtyn atyraýlyqtar 3:2 (29:27, 20:25, 20:25, 25:23, 15:12) esebimen basymdylyq tanytty.

«Pavlodar» 28 upaımen 5-orynda qalsa, «Atyraý» (22 upaı) 6-satyda tur.

Alań ıeleri «Jetisý» SQO-nyń «Esilinen» 3:1 (22:25, 25:23, 25:22, 25:19) esebimen aılasyn asyryp, 31 upaımen úzdik úshtikke qaıta kirdi.

«Jaıyq» (Oral) 46 upaımen kósh bastasa, «Aqtóbe» (35 upaı) ekinshi orynda keledi.
Dúısenbide komandalar bir kún demalady.

Eske sala keteıik, budan buryn «Tarazdyń» Almatynyń «Býrevestnıgin» qapy qaldyrǵanyn jazǵan bolatynbyz.