Voleıbol: «Atyraý» Taldyqorǵanda «Jetisý» komandasyn tize búktirdi

ASTANA. KAZINFORM – Taldyqorǵan qalasynda voleıboldan erlerdiń ulttyq lıga komandalary arasynda ótip jatqan Qazaqstan chempıonatynyń úshinshi týrynda «Jetisý» men «Atyraýdyń» kezdesýi tartysty ótti.

Ótken oıynda «Býrevestnıkke» jol bergen taldyqorǵandyqtarǵa úzdik úshtikten shyǵyp qalmas úshin tek jeńis kerek edi. 

Alań ıeleri birinshi partııany óz esebine jazdy – 26:24. Biraq ekinshi, úshinshi set «Atyraýdyń» enshisinde ketti – 25:18, 33:31. Sodan keıin de qarqynynan tanǵan joq – 25:21. Qorytyndy esep – 3:1, «Atyraýdyń» paıdasynda.

Osylaısha, óz alańynda qatarynan ekinshi ret jeńilip qalǵan «Jetisý» týrnır kestesinde 28 upaımen tórtinshi orynǵa syrǵydy. 

Oraldyń «Jaıyǵy» soltústikqazaqstandyq «Esilmen» oıynda qınala qoıǵan joq – 3:0 (25:15, 25:18, 25:16).

Upaı sanyn 43-ke jetkizgen Vıktor Kozıktiń shákirtteri Qazaqstan birinshiliginde burynǵysha kósh bastap keledi.

Ekinshi oryndaǵy «Aqtóbe» kósh sońyndaǵy «Ushqyn-Kókshetaýdan» 3:0 (25:13, 25:18, 25:19) esebimen basym tústi.

Jeksenbi kúni «Jaıyq» - «Ushqyn-Kókshetaý», «Taraz» - «Býrevestnık», «Pavlodar» - «Atyraý», «Jetisý» - «Esil» ózara synǵa túsedi. 

Eske sala keteıik, budan buryn «Býrevestnıktiń» qatarynan úshinshi kezdesýinde jeńiske jetkenin jazǵan bolatynbyz.