Voleıbol: «Atyraý» klýby «Jetisýdy» toqtata almady

ATYRAÝ. KAZINFORM — Atyraý qalasynda voleıboldan erlerdiń ulttyq lıga komandalary arasynda HHHIV Qazaqstan chempıonatynyń ekinshi týry ótip jatyr.

Beısenbi kúni ortalyq match taldyqorǵandyq «Jetisý» men «Atyraý» komandalary arasynda boldy. 

Osyǵan deıin Marat Adryshev baptaıtyn taldyqorǵandyqtar jeńis serııasyn onǵa jetkizip, upaımen jeke-dara kósh bastap kele jatqan edi. 

Al Igor Nıkolchenko jattyqtyratyn atyraýlyqtar alty kezdesý boıy jeńilmeı, tórtinshi orynǵa taban tiregen edi. Birinshi partııada alań ıeleri 25:23 esebimen basym tústi. Ekinshi, úshinshi sette taldyqorǵandyqtar sátti oınady – 25:23, 26:24. 

Tórtinshi partııada atyraýlyqtar bastapqyda 6:0 esebimen alǵa shyǵyp edi. Alaıda sol basymdylyqty saqtaı almady – 20:25. Qorytyndy esep – 3:1, «Jetisýdyń» paıdasynda. 

Osylaısha, «Atyraý» toqtata almaǵan «Jetisý» klýby týrnır kestesinde 33 upaımen jeke-dara kósh bastap keledi. 29 upaı jınaǵan «Aqtóbe» 26 qarashada «Tarazdy» 3:0 (25:12, 25:23, 25:21) esebimen utsa, sodan keıin «Ushqyn-Kókshetaýdy» qapy qaldyrdy – 3:1 (25:21, 25:27, 25:18, 29:27). 

Úzdik úshtikti túıindep turǵan bıylǵy el chempıony Oraldyń «Jaıyǵy» (25 upaı) Aqmola oblysynyń «Ushqyn-Kókshetaýyn» 3:0 (25:15, 25:20, 25:15) esebimen ońaı jeńse, sosyn «Tarazdan» da aılasyn asyrdy – 3:0 (25:14, 25:11, 25:20). 

Endi 29 qarasha kúni «Jetisý» - «Jaıyq», 30-ynda «Aqtóbe» - «Jetisý» komandalary arasyndaǵy báseke qyzý ótetin túri bar. 

Eske sala keteıik, budan buryn voleıboldan el chempıonatynda «Jetisý» komandasy «Aqtóbe» men «Jaıyqtan» basym túskenin jazǵan edik.