Voleıbol: «Arý-Astana» kútpegen jerden «Qaraǵandyny» utyp ketti

TALDYQORǴAN. KAZINFORM – Taldyqorǵan qalasynda voleıboldan áıelderdiń ulttyq lıga komandalary arasynda Qazaqstan chempıonatynyń tórtinshi týrynda alǵashqy kúnniń oıyndary aıaqtaldy.

Bul kúni kútpegen nátıje «Qaraǵandy» men «Arý-Astana» arasynda tirkeldi. 

Mamandar kútkendegideı, bastapqy eki partııada Nurlan Sadyqov jattyqtyratyn qaraǵandylyqtar basym túsken – 25:14, 25:19. Biraq budan keıin kútpegen jerden Meıirbek Nuǵyspanovtyń shákirtteri kúsh alyp ketti – 25:17, 25:23, 15:13. Qorytyndy esep – 3:2.

Osylaısha, upaı sanyn 16-ǵa jetkizgen astanalyqtar 9-oryndaǵy Oraldyń «Gratsııa KZ» komandasynan alystaı túsip, úzdik segizdikke iligetin múmkindigin ulǵaıtty.

Búgin sondaı-aq úshinshi oryndaǵy «Qýanysh» (SQO) ekinshi satydaǵy, 55 upaıy bar Óskemenniń «Berelin» 3:1 (23:25, 25:16, 25:22, 25:21) esebimen tize búktirdi. Sóıtip Azamat Esimov baptaıtyn soltústikqazaqstandyqtar 52 upaı jınap, «Berelge» jaqyndaı tústi. Bul birden jartylaı fınalǵa shyǵýǵa múmkindik beretin alǵashqy eki oryn úshin aıqastyń qyza túskendigin baıqatady.

Kósh basyndaǵy «Jetisý» (Taldyqorǵan) óz alańynda ótken jylǵy el chempıony «Turannyń» (Túrkistan) 3:0 (25:14, 25:18, 25:16) esebimen meselin qaıyryp, upaı sanyn 61-ge jetkizdi. Bulaı jalǵassa, serbııalyq Marko Grshıchtiń shákirtteri birinshi oryndy eshkimge bere qoımas.

«Almaty» komandasy kósh sońyndaǵy Pavlodardyń «Ertisin» 3:0 (25:12, 25:15, 25:20) esebimen utty.

Beısenbi kúni «Qaraǵandy» - «Gratsııa KZ», «Turan» - «Qýanysh», «Almaty» - «Arý-Astana», «Berel» - «Ertis», «Aqtóbe» - «Jetisý» komandalary ózara sheberlik talastyrady.

Eske sala keteıik, budan buryn Taldyqorǵanda voleıboldan áıelder arasynda Qazaqstan chempıonatynyń tórtinshi týry bastalatynyn jazǵan edik.

«Aqtóbe» komandasy jańa bapkerimen birge jeńiske jetti.