Voleıbol: «Altaı» besinshi ret el chempıony atandy
NUR-SULTAN. QazAqparat – Pavlodar qalasynda voleıboldan Ulttyq lıganyń áıelder komandalary arasynda Qazaqstan chempıony belgili boldy, dep habarlaıdy QazAqparat tilshisi.
Birinshilik sońynda «Altaı» (Óskemen) jáne «Jetisý» (Taldyqorǵan) komandalary altyn júlde úshin talasty.
Tórt týrdyń qorytyndysy boıynsha qos komanda birdeı upaı jınap, ózara oıyndarda eki-ekiden jeńiske jetti. Pleı-off básekesinde qaı klýb eki jeńiske qol jetkizse, sol chempıon bolatyn edi. Keshe óskemendikter tartysty oıynda taldyqorǵandyqtardy tize búktirdi – 3:2.
Búgingi match ta asa qyzý boldy. Birinshi partııa taldyqorǵandyqtardyń enshisinde ketti. Ekinshisinde óskemendikter ese qaıyrdy. Úshinshi partııada da olar edáýir alda turǵan, biraq set sońyna taman qarsylastarynyń qýyp jetýine múmkindik berip qoıdy. Degenmen 32:30 esebimen bul partııada «Altaı» basym tústi. Sońǵy set sońynda «Jetisýdiń» alda turǵanyna qaramastan, asa sátti oınaǵan serbııalyq maman Marko Grshıchtiń shákirtteri jeńisti julyp aldy – 25:22. Esep – 3:1. Eń sheshýshi sátterde komanda kapıtany, Oral voleıbolynyń túlegi Sana Anarqulova oıyn tizginin qolyna ala bildi.
Osylaısha «Altaı» besinshi ret el chempıony atandy.
«Almatydan» aılasyn asyrǵan soltústikqazaqstandyq «Qýanysh» komandasy qola júldeger atandy.
