Voleıbol: Almatydaǵy gran-prı týrnıri márege jetti
ASTANA. QazAqparat - Almaty qalasyndaǵy Balýan Sholaq atyndaǵy sport saraıynda búgin voleıboldan áıelder quramalary arasynda Álemdik gran-prı týrnıriniń ekinshi kezeńi márege jetti, dep habarlaıdy «QazAqparat» tilshisi.
«Qazsport» telearnasynan tikeleı efırde kórsetkenindeı, sońǵy oıynda Qazaqstan jáne Horvatııa quramalary alańǵa shyqty. Qos komanda osynyń aldyndaǵy eki kezdesýinde utylyp qalǵandyqtan, olardyń qaı-qaısysyna da jeńis aýadaı qajet edi. Ásirese, óz elimizde óner kórsetken Vıacheslav Shaprannyń shákirtteri qorytyndy matchqa tastúıin kúıde shyqty. Qazaqstan quramasyndaǵy negizgi oıynshylarynyń birazy (baılanystyrýshy Korınna Ishımtseva, shabýylshy Sana Anarqulova jáne basqalar) jaraqattanyp qalǵandyqtan, bul jarysqa qatysqan joq. Komanda kapıtany Radmıla Beresnevanyń ózi jaraqatymen oınady. Birinshi partııada qazaqstandyqtar sátti oınaı bildi. Esesine ekinshi partııada horvattar ese qaıtardy. Degenmen sońǵy eki partııada Qazaqstan quramasy qarsylastaryna des bermedi. Sóıtip 3:1 esebimen osy týrnırdegi alǵashqy jeńisine qol jetkizdi. Ásirese, R.Beresnevamen qatar shabýylshy Ekaterına Jdanova, baılanystyrýshy Natalıa Akılova, tosqaýyl qoıýshy Alesıa Safronova, lıbero Dıana Kempolar jaqsy oınady. Ekinshi partııadan bastap Katerına Tatkony Inna ıAkovleva sátti almastyra bildi.
Aıta keteıik, Almatydaǵy gran-prı týrnırinde barlyq kezdesýlerin utqan Germanııa quramasy 9 upaımen jeńimpaz atandy. Kolýmbııa quramasy alty upaımen ekinshi, qazaqstandyqtar úshinshi orynǵa kóterildi.
Qazaqstan voleıbol federatsııasynan alynǵan málimetke qaraǵanda, bul jeńis qazaqstandyqtarǵa úsh upaımen ekinshi topta onynshy orynǵa kóterilýge múmkindik berdi. Endi Qazaqstan quramasy 21-23 shilde aralyǵynda Ońtústik Koreıada ótetin Álemdik gran-prıdiń úshinshi kezeńine attanady. Bul joly V.Shapran shákirtterine Ońtústik Koreıa, Kolýmbııa jáne Polsha komandalary qarsy turmaq. Odan keıin Qazaqstan quramasy Azııa chempıonatynda da óner kórsetetin bolady.
