Voleıbol: «Aqtóbe» tartysty matchta «Atyraýdy» utty

TALDYQORǴAN. KAZINFORM – Taldyqorǵan qalasynda voleıboldan erlerdiń ulttyq lıga komandalary arasynda Qazaqstan chempıonatynyń úshinshi týrynda sársenbi kúngi oıyndar aıaqtaldy.

Búgin «Aqtóbe» men «Atyraý» alańǵa shyqty.

Sergeı Trıkoz jattyqtyratyn aqtóbelikter 27 upaımen týrnır kestesinde ekinshi orynda tursa, atyraýlyqtar sońǵy kezde óz oıynyn taba bastaǵan edi.

Birinshi partııada Islam Jumabekovtiń shákirtteri 25:23 esebimen basym tússe, ekinshisinde «Aqtóbe» ese qaıyrdy – 28:26.

Aqtóbelikter úshinshi setti (25:16) óz paıdasyna aıaqtaǵanymen, «Atyraý» tarazy basyn teńestirdi – 25:23. Biraq besinshi, sheshýshi partııada «Aqtóbe» jeńisti julyp aldy – 16:14.

Taǵy bir tartysty kezdesý ótken jylǵy chempıon «Taraz» ben qola júldeger «Jetisý» arasynda órbidi.

Munda matchty Marat Adryshev baptaıtyn alań ıeleri qarqyndy bastady – 25:13. Degenmen ıÝrıı Bashkatovtyń shákirtteri qarymta qaıtardy - 27:25. Budan keıin komandalar partııa almasty – 21:25, 25:21. Aqyry jeńis «Jetisýǵa» buıyrdy – 15:8. Eki oıynda da qorytyndy esep 3:2 boldy.

Taldyqorǵandyqtar 28 upaımen burynǵysha úzdik úshtikte keledi.

«Esil» (SQO) kósh sońyndaǵy «Ushqyn-Kókshetaýdy» 3:0 (25:23, 25:22, 25:18) esebimen tize búktirdi.

Beısenbi kúni «Aqtóbe» - «Esil», «Jaıyq» - «Atyraý», «Pavlodar» - «Taraz», «Jetisý» - «Býrevestnık» komandalary ózara synǵa túsedi.

Eske sala keteıik, budan buryn «Jaıyq» komandasynyń «Býrevestnıkten» basym túskenin jazǵan bolatynbyz.