Voleıbol: «Aqtóbe» óz alańynda «Jaıyqty» jeńdi

ASTANA. KAZINFORM — Aqtóbe qalasynda voleıboldan erlerdiń ulttyq lıga komandalary arasynda Qazaqstan chempıonaty tórtinshi kishi týrynyń aıasynda alań ıeleri «Jaıyqpen» kezdesti.

«Jaıyq» (bas bapkeri Vıktor Kozık) ótken jyly el chempıony atansa, Sergeı Trıkoz jattyqtyratyn aqtóbelikter kúmis júldeni qanaǵat tutqan edi.

Bul joly «Aqtóbe» alǵashqy eki sette asa qınalǵan joq — 25:20, 25:22.

Úshinshi partııada oraldyqtar 24:23 esebimen alda turyp, setboldy paıdalana almady — 26:28. Qorytyndy esep — 3:0, «Aqtóbeniń» paıdasynda.

Keshe «Esildi» 3:0 (25:23, 25:16, 25:19) esebimen tize búktirgen aqtóbelikter upaı sanyn 55-ke jetkizip, týrnır kestesinde burynǵysha ekinshi orynda keledi.

Taldyqorǵan qalasynda ótip jatqan «V» tobynyń oıyndarynda bıylǵy sýperkýbok ıegeri «Jetisý» qamshy saldyrar emes. Marat Adryshevtiń shákirtteri aldymen «Tarazdan» aılasyn asyrdy — 3:0 (25:18, 25:19, 25:17).

Búgin Almatynyń «Býrevestnıgin» 3:0 (26:24, 25:22, 25:15) esebimen qapy qaldyrǵan «Jetisý» 59 upaımen kósh bastap tur. 

Eske sala keteıik, budan buryn voleıboldan «Jaıyq» klýby Aqtóbede «Atyraýdan» basym túskenin jazǵan edik.